Култуурнай тэрээһиннэр билиэттэрин төннөрүү бэрээдэгэ бигэргэннэ

Россия бырабыыталыстыбата кэнсиэрдэр, испэктээкиллэр, быыстапкалар уонна экскурсиялар билиэттэрин төннөрүү саҥа быраабылаларын бигэргэттэ.

Инники тустаах быраабылалары уонна ирдэбиллэри тэрээһини ыытар тэрилтэлэр бэйэлэрэ олохтуур этилэр.

Билиэти төннөрүү саҥа быраабылалара көрөөччү тэрээһиҥҥэ кэлбэтэх биричиинэтиттэн тутулуктаахтар. Өскөтүн көрөөччү бэйэтэ ыалдьыбыт эбэтэр дьиэ кэргэнин чилиэнэ дуу, чугас аймаҕа дуу өлбүт түгэнигэр тэрээһин ыытыллар да күнүгэр билиэт толору сыанатын төннөрүллүөн сөп.

«Тэрээһин ыытыллар күнүттэн хойутаабакка тэрилтэҕэ эбэтэр каассаҕа билиэти төннөрүү туһунан сайабылыанньа биэрии ирдэнэр. Сайабылыанньаҕа билиэт эбэтэр электроннай чек копията, пааспар копията уонна туоһулуур докумуоннар копиялара сыһыарыллар — больничнай лиис, өлүү туһунан туоһу сурук уонна аймахтыы буоларгын туоһулуур докумуон», – диэн докумуоҥҥа этиллэр.

Көрөөччү болдьоҕор аҕалар кыаҕа суох буоллаҕына, икки нэдиэлэ иһигэр больничнай лиис эбэтэр өлүү туһунан туоһу сурук копиятын ситэри тиксэриэн сөп. Онтон атын докумуоннар болдьоҕор тиксэриллиэхтээхтэр. Сайабылыанньаны бэйэн тиийэн биэриэххин, почтанан эбэтэр интернет нөҥүө ыытыаххын сөп.

Харчыны төннөрүү ньыматын тэрилтэ бэйэтэ быһаарар. Өскөтүн көрөөччү сайабылыанньаны эбэтэр туоһулуур докумуоннары болдьохтон хойут тиксэрдэҕинэ, харчыны төннөрүүгэ аккаастыахтарын сөп.

Көрөөччү үөһэ ыйыллыбыт биричиинэлэртэн атын биричиинэнэн аккаастанар түгэнигэр, сайабылыанньа, билиэт, чек уонна пааспар копиялара тэрээһин буолуон үс күн иннинэ тиксэриллиэхтээх.

«Төннөрүллэр суума быраһыана култуура туһунан сокуоҥҥа олоҕуран быһаарыллар уонна тэрээһин ыытыллар күнүгэр диэри хас күн хаалбытытттан тутулуктаах. Уон күн хаалбыт буоллаҕына көрөөччү билиэт сыанатын 100 %-н төннөрүөн сөп, биэс күн хаалбыт буоллаҕына — 50 %-н, үс күн хаалбыт буоллаҕына — 30 %-н. Аахсыйалар уонна анал бырагыраамалар чэрчилэринэн атыыламмыт билиэттэр төннөрүллүмүөхтэрин сөп», – диэн этиллэр.

Абонемент сыаната көрөөччү ыалдьыбыт эбэтэр аймаҕа өлбүт эрэ түгэнигэр төннөрүллэр. Онуоха абонемеҥҥа киирэр бастакы тэрээһин ыытылла илик эрэ буоллаҕына. Бастакы тэрээһин ыыттыллара үс күн иннинэ абонемены көрөөччү быһаарыытынан төннөрүөххэ сөп.

«Көрөөччү абонемеҥҥа киирэр иккис эбэтэр үһүс тэрээһинтэн аккаастанар түгэнигэр, тэрилтэ төннөрүллэр суума кээмэйин уонна бэрээдэгин бэйэтэ быһаарар», – диэн докумуоҥҥа суруллар.

Ону тэҥэ ааттаах-суоллаах билиэттэри уонна абонеменнары тэрээһин ыытыллара уон күн хаалыан иннинэ атын киһи аатыгар уларытыахха сөп. Чэпчэтиилээх билиэттэр ыйыллыбыт чэпчэтиинэн туһанар кыахтаах эрэ дьоҥҥо уларытыллаллар.