Куорат таһынааҕы суол оҥоһуутугар 80 мөлүйүөнтэн тахса солкуобай көрүллүөҕэ

РФ бэрэсэдьиэнэ Владимир Путин бигэргэппит «Куттала суох уонна хаачыстыбалаах айан суола» национальнай бырайыак чэрчитинэн, куорат таһынааҕы үс бөһүөлэккэ суол оҥоһуллуоҕа. Бу туһунан ТАСС иһитиннэрэр.

«Бүддьүөт икки ардыгар трансфер кээмэйэ 589 мөлүйүөн солкуобайтан  671,2 мөлүйүөҥҥэ диэри үрдүүрүгэр эбии 82,2 мелүйүөн солкуобай кээмэйдээх эбии сөбүлэҥ атырдьах ыйыгар куорат мээрийэтин кытта түһэрсилиннэ», — диэн иһитиннэриигэ этиллэр.

Эбии көрүллүбүт үбүлээһини 2021-2023 сылларга национальнай бырайыак чэрчитинэн былааннаммыт эбийиэктэри бырайыактааһыҥҥа уонна Табаҕа, Тулагы, Хатас бөһүөлэктэрин айан суолларын тутууга ыытылларын туһунан бэлиэтэнэр. Куорат таһынааҕы бөһүөлэктэр суолларын уопсай уһуна 10,3 килэмиэтир, 2021 сылга үлэҕэ киирэрэ былааннанар.

2020 сылга өрөспүүбүлүкэҕэ уопсайа 186,09 килэмиэтир региональнай  суол уонна 23,5 килэмиэтир Дьокуускай уулуссаларын ситимэ  өрөмүөннэниэҕэ.