Кустуурга спортзал баһаарын уота оскуоланы ылла

Эбээн Бытантай Кустууругар спортивнай саала баһаарын уота оскуола дьиэтин ылла. Бу туһунан бырабыыталыстыба бастакы вице-премьерэ Алексей Колодезников иһитиннэрдэ.

Дьокуускай бириэмэтинэн 20.26 чааска икки эбийиэк умайа турар: оскуола уонна сыста турар арочнай спортзал.

Баһаары умуруорууга олохтоохтор уонна биир бодобуос кыттыы ылар. Ууну ОДьКХ ититиитин ситимин гидраныттан ылаллар.

Оскуолаттан 60 миэтэрэ тэйиччи турар хочуолунайы хонтуруолга ыларга соруйулунна. Инники этиллибитинэн, Кустууртан 100 килэмиэтир кэриҥэ тэйиччи турар Баатаҕай Алыытыттан баһаарынай массыыналар айаннаабыттара.