Кыайыы Знамятын Саха сирин саамай үрдүк туочукатыгар таһаардылар

Кыайыы Знамятын куоппуйатын Улуу Кыайыы 75 сылыгар анаан Муома улууһугар хайаҕа таһаардылар. Бу туһунан ТАСС иһитиннэрэр.

От ыйын 7 күнүгэр Дьокуускайтан 12 киһи састааптаах экспедиция айаннаабыта. Анаммыт сиргэ хамаанда 1,7 тыһыынча килэмиэтири массыына, вездеход, катамаран көмөтүнэн уонна сатыы уҥуордаан тиийбит. От ыйын 18 күнүттэн хайаҕа тахсыы саҕаламмыт.

Хамаанда знамяны Саха сирин саамай үрдүк туочукатыгар — 3003 миэтэрэ муҥутуур үрдүктээх Кыайыы хайатыгар таһаарда. 1945 сыллаахха фашистары кыайыы иһин хайа Кыайыы диэн ааттаммыта.