«Кыталык» Россия үтүөлээх ансаамбыла 40 сыллах үбүлүөйүн бэлиэтиир

1979 сыллаахха Майа бөһүөлэгэр «Кыталык» ансаамбыл тэриллибитэ. Ол кэмтэн ыла бу күҥҥэ диэри Майалар үҥкүүнү өрө тутан, аан дойдуга тиийэ Саха сирин ааттаттылар. Бу күннэргэ Россия үтүөлээх кэллэктиибэ 40 сыллах үбүлүөйдээх кэрчигин бэлиэтиир. 

Санаан көрүҥ, 40 сыл устаталаах туоратыгар хас эмит тыһыынчанан ыччат үҥкүүгэ сүгүрүйдэҕэ, үҥкүүнэн үтүөҕэ үөрэннэҕэ. Көлүөнэ утума бөҕө. Билигин аатырбыт ансаамбылга 450 оҕо уһуйуллар.

«Биһиги ансаамбылбыт тэриллэригэр ис сүрэхтэриттэн саха буолалларын убаастыыр уонна ытыктыыр дьоннор Уустаах Избеков уонна Алексей Попов «Кыталык» диэн ааты иҥэрбиттэрэ. Ансаамбыл сахалыы тыыннаах буоларыгар бэйэлэрин ис дууһаларын биһиэхэ хаалларан барбыттара», — диэн «Кыталык» Россия үтүөлээх ансаамбылын салайааччыта Василий Винокуров кэпсиир.

Үөрэ-дьүөрэ үктэнэр саха төрүт үҥкүүтүн, араас омуктар хамсаныыларын, аныгы тэтими кытта бииргэ хаамсан фитнес аэробика, спортивнай уонна бальнай үҥкүүлэри толороллор. Бэл диэтэр эйэҕэс эбэлэр эргиийэн тэллээрэллэр.

Онон «Кыталыктар» күөх урсуҥҥа кыыралдьыйа көтөн өссө да үрдүктэн үрдүккэ дайыахтара.