Өлөөҥҥө хочуолунай умайыыта таҕыста

Алтынньы 28 күнүгэр Өлөөн сэлиэнньэтигэр хочуолунай умайыыта таҕыста. Уот тутуу хоруобуйатын 50 кв миэтэрэ иэнининэн сиэбит. Баһаар тута умуруоруллубут. Ититии биэрэр сүрүн эбийиэктэр эмсэҕэлээбэтэхтэр. Баһаары умуруорууга 20 киһи уонна биэс тиэхиньикэ кытыыны ылла.

«Өлөөҥҥө олохтоох бириэмэнэн киэһэ 20.10 чааска, 29 эбийиэгин ититиинэн хааччыйа «АСАО» хочуолунайыгар, баһаар тахсыбытын туһунан иһитиннэрии киирбитэ. Баһаар тута умуруорулунна. Көрүү түмүгүнэн носуостар эмсэҕэлээбэтэхтэрэ билиннэ, биир хочуол үлэлиир туруктаах», – диэн СӨ бэрэссэдээтэлин бастакы солбуйаачы Алексей Колодезников эттэ.

Суһал хамыыһыйа быһаарыытынан 150 миэтэрэ усталаах ититии ситимин тардан, эбийиэктэри саҥа хочуолунайга холбуур үлэ ыытыллар.

«АСАО» хочуолунайа 29 эбийиэги: 22 чааһынай дьиэни, икки элбэх кыбартыыралаах дьиэни уонна икки административнай тутууну ититиинэн хааччыйар диэн бэлиэтэнэр. Хочуолунай хаарбак туруктааҕынан ааҕыллан, сэтинньи ый ортотугар эбийиктэри саҥа үлэҕэ киирбит «Молодежнай» хочуолунайга көһөрүөххтээх эбиттэр.