Үлүйүүттэн харыстыыр сириэстибэни айдылар

Өрөспүүбүлүкэтээҕи технопарка резиденнэрэ тириини үлүйүүттэн харыстыыр Freeze Protect plus инновационнай сириэстибэни оҥорон таһаардылар.

«Састааба үлүйүү сүрүн биричиинэтин — тирии килиэккэлэрин уута тоҥон, муус кристаллар үөскээһиннэрин түмүгэр тирии бааһырыытын учуоттаан оҥоһуллубут», — диэтэ Саха сирин инновацияҕа, цифровой сайдыыга уонна инфокоммуникационнай технологияҕа миниистирэ Анатолий Семенов.

Сириэстибэ састаабыгар баар криопротектордар тирии үлүйүүтүн бопсоллор. Тирии уратытыттан уонна күн-дьыл туругуттан харыстыыр сириэстибэ дьайыыта тутулуктаах, -50 ˚ С кыраадыска 40 мүнүүтэттэн 2,5 чааска диэри халбаҥныыр.

Сириэстибэни тымныы ордук хаарыйар сирдэригэр: иэдэскэ, муннуга, кулгаах эминньэҕэр сотуллар.

Freeze Protect plus тымныыттан харыстыыр уонна бааһы үтүөрдэр. Онон итиигэ сиэтиигэ, үлүйүүгэ, кумаар уонна оҥоойу ыстаатаҕына туһаныахха сөп.

Сириэстибэ туһааннаах бэрэбиэркэни барытын ааспыт, ЕАС сөп түбэһэр декларациялаах. Дьокуускай маҕаһыыннарыттан атыылыаһыахха сөп.