Өлөөкө Күөлгэ баһаар көрдүгэннэрин бохсуу ыытылынна

Орто Халыма улууһугар ойуур баһаардарыттан олохтоммут балаһыанньа оннугар түстэ. Бу туһунан СӨ баһылыгын уонна бырабыыталыстыбатын дьаһалтатын пресс-сулууспата иһитиннэрэр.

«Ойуур баһаара Өлөөкө Күөл сэлиэнньэтигэр биир килэмиэтир чугаһыы сырытта. Билигин баһаар көрдүгэннэрин бохсуу ыытылынна, баһаары утарар балаһа оҥоһулунна. Манна олохтоохтору кытта ЫБММ аэромобильнай бөлөҕө уоту утары үлэлэһэр», – диэн улуус баһылыгын бастакы солбуйааччыта Руслан Гаврильев кэпсээтэ.

Сыбаатайтан икки килэмиэтирдээх сиргэ ойуур баһаарын умуруоруу ыытыллар. Оннугар 70 киһиттэн турар түөрт биригээдэ үлэлиир.

Эбээххэ нэһилиэнньэлээх пуунтан алта килэмиэтирдээх сиргэ баар бохсуллубут уоту кэтээн көрүү ыытыллар.