Өлүөнэ муостатын бырайыактааһына 2020 сылга түмүктэниэҕэ

Өлүөнэ өрүһү туоруур муоста бырайыактааһына быйыл түмүктэнэрэ былааннанар. Бу туһунан «ВИС» бөлөх пресс-сулууспата иһитиннэрэр.

«Бүгүҥҥү күҥҥэ инженернэй-геодезическэй, инженернэй-гидрометеорологическэй уонна инженернэй-экологическэй чинчийиилэр толору түмүктэннилэр. Инженернэй-геологическэй чинчийии үлэлэрин 95 %-на түмүктэннэ», — диэн холдинг тириэрдэр.

Генеральнай бырайыактааччынан «Институт Гипростроймост – Санкт-Петербург» АУо буолара бэлиэтэнэр. Бу хампаанньа Крым муостатын, Владивосток куорат Русскай арыытын муостатын курдук Россия суолларын инфраструктуратын сүдү эбийиэктэрин бырайыактарынан дьарыктаммыта.

Билигин Россия бырабыыталыстыбатын бэрэссэдээтэлин солбуйааччыта Марат Хуснуллин соругунан муоста тутуутун болдьоҕун биир сыл кылгатыы боппуруоһа көрүллэр. Бу сорудах вице-премьер соторутааҕыта өрөспүүбүлүкэ Ил Дарханын Айсен Николаевы кытта көрсүһүүтүн түмүгүнэн бэриллибитэ.

Саха сиригэр ураты суолталаах инфраструктурнай эбийиэк үлэҕэ киириитин түргэтэтии дьоһун суолталааҕа федеральнай киининэн бигэргэммитэ. Муоста тутуллаата өрөспүүбүлүкэ төгүрүк сыл устата быстала суох сырыынан хааччыллыытын 20,9 %-тан 83 %-ҥа диэри үрдэтиэҕэ. Ону тэҥэ хотугу таһаҕас тиэрдии ороскуотун 4,1 миллиард солкуобайынан намтатыаҕа.