Өлүөнэ муостатын көдьүүһэ инвестицияны 1,6 төгүл куоһарар

Россия экономическай сайдыытын министиэристибэтин ааҕыытын түмүгүнэн Өлүөнэ муостатын социальнай-экономическай көдьүүһэ тутуу оросукотун 1,6 төгүл куоһарар. Бу туһунан СӨ баһылыгын уонна бырабыыталыстыбатан дьаһалтатын пресс-сулууспата иһитиннэрэр.

«Муоста тутуутун докумуоннарын оҥоруу түмүктэнэн судаарсытыбаннай экспертиза көрүүтүгэр ыытылынна. «Сбербанк» Өлүөнэ өрүһү туоруур муоста тутуутун концессиятын үп-харчы өттүн кыттыгаһа буоларын туһунан сөбүлэһии баттанна», — диэн СӨ бырабыыталыстыбатын бэрэссэдээтэлин солбуйааччытын э.т. Дмитрий Бердников Өлүөнэ муостатын тутуу боппуруостарынан үлэ бөлөҕүн уочараттаах мунньаҕын кэмигэр эттэ.

Судаарыстыбаннай экспертиза көрүүтүн түмүгэ таҕыстаҕына уонна үбүлээһин кэнниттэн тутуу саҕаланыаҕа. Онон сибээстээн муоста тутуллар сиринээҕи сир учаастактарын боппуруоһа бастакы күөҥҥэ тахсыбытын Дмитрий Бердников бэлиэтээтэ уонна ол быһаарыытын түргэтэтэргэ соруйда.

Ону сэргэ Өлүөнэ муостатын тутуутугар киирии суоллары уонна өрүс сүнньэ уларыйар уратыларын наука өттүттэн учуоттуур боппуруос көтөҕүлүннэ.

«ВИС» хампаанньалар бөлөхтөрө бэлиэтииринэн бырайыак региоҥҥа мультипликативнай туһалаах буолуоҕа: саҥа үлэ миэстэлэрэ тэриллиэхтэрэ, бүддьүөккэ киирэр үп кээмэйэ улаатыаҕа, аттынааҕы территориялар сайдыахтара уонна олох хаачыстыбата тупсуоҕа.

«Муоста үлэҕэ киирдэҕинэ Саха сирин үбүн кээмэйэ сыллата 3 %-н үрдүөн сөп. Россия экономическай сайдыытын министиэристибэтэ оҥорбут социальнай-экономическай сыанабылынан, Өлүөнэ муостатын көдьүүһэ тутуу оросукотун 1,6 төгүл куоһарар», — диэн этиллэр.