Өлүөнэ муостатын тутуу Уһук Илин сайдыытын тускулугар киирдэ

Өлүөнэ муостатын тутуу Уһук Илин 2024 сылга диэри сайдыытын (2035 сылга диэри салҕаныахтаах) национальнай тускулугар киирдэ. «Саха сирэ социальнай-экономическай сайдыытын түргэтэтэр сыаллаах Дьокуускайга Өлүөнэ өрүһү туоратар муоста тутуллуохтаах», – диэн бырагыраамаҕа суруллар. Тускулу балаҕан ыйын 24 күнүгэр бигэргэттилэр. Санатан эттэххэ, 2020 сыл ахсынньытыгар диэри бырайыак-смета докумуона бүтүөхтээх, экспертизаны ааһыахтаах. 2024 сылга диэри тутуллан бүтүөхтээх.
Ону таһынан, тускул чэрчитинэн 2025 сылга Денисовскай, 2024 сылга Инаглинскай таас чох хостуур сирдэргэ, 2025 сылга Нежданинскайдааҕы көмүс хостуур сиргэ, 2024 сылга Томтордооҕу ниобий хостуур сиргэ комбинаттар үлэлэрэ күүһүрүөхтээх. Икки сыл устата «Саюри» теплица уонна дааннайдары түмэр киин тутуллуохтаах. 2026 сылга диэри Өймөкөөҥҥө «Полюс холода» туристическай кластер, Өлүөнэ очуостара национальнай пааркалаах «Лена» кластер тэриллиэхтээхтэр. 2025 сылга диэри Элгэтээҕи таас чох комплекса, Жатайдааҕы судоверфь, Аллараа Бэстээххэ таһаҕас терминала, «Якутия» ТОРга ювелирнай собуот, Дьокуускайга биотехнология чинчийэр киинэ тутуллуохтаах.

Бырагыраама чэрчитинэн 2024 сылга диэри 66 доруобуйа харыстабылын 66 тэрилтэтэ, 10 оскуола иннинээҕи саастаах оҕолор тэрилтэлэрэ, 2 социальнай харалта тэрилтэтэ, 49 култуура дьиэтэ, 70 спортивнай эбийиэк өрөмүөннэниэҕэ. Хапытаалынай өрөмүөн 83 медицина тэрилтэтигэр, 32 оскуолаҕа, 29 орто анал үөрэх тэрилтэтигэр, 86 спортивнай эбийиэктэргэ буолуоҕа. 2024 сылга диэри дэгиттэр оҕолору өйүүр киин, модельнай библиотека тэриллиэҕэ. Оскуолаларга эбии 2 745 миэстэ таһаарыахтара. 2024 сылга диэри сылга дьиэ тутуутун 690 квадратнай миэтэрэнэн элбэтэр былааннаахтар. 1 056,59 тыһыынча квадратнай миэтэрэ хаарбах туруктаах дьиэттэн дьону көһөрүөххэ. 2024 сылга диэри биэс тыһыынча килэмиэтир суол өрөмүөннэниэ. 16 аэропорт балаһата өрөмүөннэниэ. 2025 сылтан 102 биэссэр-акушер пууна, амбулатория тэриллиэҕэ. 197 скорай массыынатын ылыахтара. 2025 сыл кэннэ 5,9 килэмиэтир улуус суолларын өрөмүөннүөхтэрэ, 44 нэһилиэккэ диэри суолу тутуохтара. Ленскэй, Сааскылаах, Өлөөн, Баатаҕай, Сунтаар, Муома, Усть-Куйга, Уус-Майа, Алдан, Зырянка портара өрөмүөннэниэ. 2025 сылтан «Тикси» муора пордун оҥоруохтара уонна Кыһыл Сыыр магистральнай гаас ситимин 84 килэмиэтирин тутуохтара.
Бырагыраама регион экономикатын чөлүгэр түһэрэр, демографияны, дьон олоҕун тупсарар сыаллаах оҥордулар.