Өлүөнэ муостатын тутууга бэлэмнэнии үлэтэр кэмигэр ыытыллар

«ВИС» бөлөх хампаанньатын дириэктэрдэрин сэбиэтин чилиэнэ Сергей Ромашов «Транспорт России» норуоттар икки ардыларынааҕы форумҥа Өлүөнэни туоратар муостаны тутуу үлэтэ график быһыытынан баран иһэр диэтэ. Бу туһунан Ил Дархан уонна бырабыыталыстыба дьаһалтатын пресс-сулууспата иһитиннэрэр. «Биһиги Главгосэкспертизаны аастыбыт. 2021 сыл саҕаланыыта бэлэмнэнии үлэтэ барыаҕа, ыам ыйын диэки бырайыактыыр-сметалыыр докумуоннара көрүллүөхтэрэ, сыл ортото тутуу саҕаланыаҕа. Бырайыакка харчы көрүллэр», – диэбит «ВИС» бөлөх бэрэстэбиитэлэ. 2020 сыл ахсынньытыгар муоста тутуутун бырайыага бастакы экспертизаны ааһыахтаах.

Өлүөнэни туоратар муоста нэһилиэнньэ барар-кэлэр кыаҕын 21-тэн 80%-ҥа диэри элбэтиэҕэ. Санатан эттэхэ, соторутааҕыта бырабыыталыстыба бэрэссэдээтэлин бастакы солбуйааччытын э.т. Дмитрий Бердников муоста тутуллар сирин көрбүтэ.