Үлэ министиэристибэтэ балыыһа лииһин толоруу бэрээдэгин быһаарда

Үлэ дуогабарынан, ол иһигэр кылгас болдьохтоох дуогабарынан, үлэлиир Саха сирин олохтоохторо страховкалаах буолуохтаахтар. Бу туһунан СӨ үлэҕэ уонна социальнай сайдыыга министиэристибэтин пресс-сулууспата иһитиннэрэр.

«Үлэһит киһи ыалдьар, эт-хаан эчэйиитин ылар, эбэтэр карантиҥҥа олорор түгэнигэр үлэлиир кыаҕа суоҕун туһунан лиис толоруллар уонна босуобуйа төлөнөр», – диэн этиллэр.

Инники страховкалаах үлэһит ыалдьан эбэтэр эт-хаан эчэйиитин ылан үлэлиир кыаҕын сүтэрэр түгэнигэр, үлэ биэрээччи бастакы үс күннээх босуобуйатын төлүүр. Онтон атын кэмэ Россия социальнай страховкалааһын пуондатын бүддьүөтүттэн төлөнөр.

Үлэһит карантиҥҥа олорор кэмигэр босуобуйа бастакы күнүттэн толору социальнай страховкалааһын пуондатыттан төлөнөр.

Үлэ биэрээччи кылгас кэмҥэ үлэлиир кыаҕа суох буолуу булгуччулаах страховка усунуоһун олохтоммут болдьоххо кэмигэр төлөөн иһиэхтээх.

Саха сирин олохтоохторо үлэ сыһыаныгар сыһыаннаах ыйытыктары СӨ үлэҕэ министиэристибэтин «суһал линиятын» нүөмэригэр эрийэн билсиэхтэрин сөп: 508–075.

Сокуоннайа суохтук үлэттэн ууратыы түгэнигэр өрөспүүбүлүкэтээҕи нэһилиэнньэ дьарыктаах буолуутун судаарыстыбаннай кэмитиэтигэр биллэрии ирдэнэр: 507–850.

Үлэ биэрээччи үлэһит быраабын кэһэр түгэнигэр Саха сирин судаарыстыбаннай үлэ инспиэксийэтигэр биллэриэххэ сөп: 8 914 274– 22–66.

Урбааны өйөөһүн боппуруостарынан СӨ урбааҥҥа министиэристибэтин исписэлиистэриттэн туоһулаһыахха сөп: 8 800 100–58–80.

Медицинскэй тэрилтэлэр коронавирус инфекциятыттан олохтоммут хааччахтарын, үлэлиир болдьохторун уонна бэрээдэктэрин туһунан СӨ доруобуйа харытабылыгар министиэристибэтиттэн чуолкайдыахха сөп: 8 800 100–14–03.

Балыыһа лииһин төлөөһүҥҥэ сыһыаннаах ыйытыктары Социальнай страховкалааһын пуондатын исписэлиистэриттэн билсиэххэ сөп: 8  800 302–75–49, 8 411 231–59–19

Грипп, ОРВИ уонна коронавирус инфекцията күүскэ тарҕаныыларын сэрэтэр миэрэлэргэ сыһыаннаах ыйытыктары Роспотребнадзор Саха сиринээҕи салаатыттан билсиэххэ сөп: 8 800 550–21–24.