Үлэ онлайн-дьаарбаҥката саҕаланна

«Траектория карьеры» диэн үлэ онлайн-дьаарбаҥката бүгүн, тохсунньу 27 күнүгэр үлэлээн саҕалаата. Үлэ көрдөнөөччүлэр тохсунньу 27-28 күннэригэр РаботаВЯкутии.рф сайт нөҥүө киирэн иллэҥ вакансиялары көрүөхтэрин, быһалыы резюме ыытыахтарын сөп. Маннык хайысхалар үлэлииллэр: бырамыысыланнас, тутуу, тыа хаһаайыстыбата, ОДьКХ, культуура, үөрэх, энергетика.

Дьаарбаҥка арыллыытыгар Ил Дархан Айсен Николаев кытынна. Эдэр исписэлиистэри үлэнэн хааччыйыы — судаарыстыба сүрүн соруга диэтэ. 2016 сылтан «Импульс» үлэ биржата үлэлиир. Ону таһынан «Олохтоох кадрдар — бырамыысыланнаска» бырайыак баар, 2017 сылтан 25 тыһыынча киһи үлэ булла. Дьаарбаҥкаҕа кыттарга workyakutia@mail.ru аадырыска резюме ыытыахтарын наада.