Ленскэйгэ бензовоз массыына умайда

Ленскэй куорат Нюйскай уулуссатыгар «Ивеко» мааркалаах бензовоз массыына умайа турарын туһунан иһитиннэрии бүгүн, тохсунньу 14 күнүгэр, сарсыарда 10.51 чааска оройуон баһаарынай-быһыыр сулууспатыгар киирбит. Бу туһунан Россия ыксаллаах быһыыга-майгыга министиэристибэтин Саха сиринээҕи салаатын пресс-сулууспата тириэрдэр.

«Баһаары утары охсуһар сулууспа миэстэтигэр түөрт мүнүүтэнэн тиийиитигэр, массыына кабината умайа турар эбит. Уот тимир көлө кабинатын, арааматын, шасситын сиэбит, уопсайа 20 кв миэтэрэ иэннээх сиргэ тарҕаммыт. Сабаҕалыылларынан, тиэхиньикэ уматыгын шлангата быстыбыт. Буруйдаах уонна хорумньуну кээмэйэ быһаарыллар», – диэн этиллэр.

Уоту умуруорууга үс тиэхиньикэ уонна 17 киһи үлэлээтэ. Эмсэҕэлээбит дьон туһунан иһитиннэрии быһаарыллар.