Ленскэй 1 №-дээх оскуолатын өрөмүөнэ түмүктэниэҕэ

Ленскэй 1 №-дээх оскуолатыгар өрөмүөн үлэтэ түмүктэниэҕэ. Бу туһунан улуус администрацията иһитиннэрэр.

Оскуола аактабай саалата, анал үөрэхтээһин кэбиниэтэ уонна видеонаблюдение систиэмэтэ өрөмүөннэннэ. Уопсайа 70 камера турда, ол иһигэр 43 — оскуола иһигэр уонна 27 — оскуола таһыгар.

«Матырыйаалы тиксэрии үлэтигэр кыһалҕалар үөскээбиттэринэн, оскуола тас өттүн тупсаран оҥоруу үлэтэ балаҕан ыйын 1 күнүгэр диэри бүппэтэ. Бастатан туран, киирэр аан киин былаһааккатыгар таас билиитэ ууруллуоҕа», — диэтэ МБУ «Гранит» дириэктэрэ Владимир Арев.

Оскуола таһынааҕы сири тупсарыыга киирэр: күөх үүнээйини олордуу, ууруна, сынньанар, велосипед уурар сирдэри оҥоруу уонна 1941 сыллаахха оскуоланы бүтэрээт, сэриигэ айаннаабыт 1 №-дээх оскуола үөрэнээччилэрин, учууталларын кэриэстэригэр пааматынньыгы уларытыы.  

2020 сылга 1 №-дээх оскуола өрөмүөнүгэр, Ленскэй оройуон бүддьүөтүттэн 11,5 мөлүйүөн солкуобай көрүллүбүтэ.