Ленскэй 120-тэн тахса ыала хаарбах дьиэттэн көһүөҕэ

Хаарбах дьиэттэн көһөрүү бырагырааматын чэрчитинэн, 2021 сыл түмүктэниэр диэри, Ленскэй 123 ыала саҥа кыбартыыра ылыаҕа. Бу туһунан куорат баһылыга Александр Хорунов «Саха» НКИХ иһитиннэрдэ.

«2020 сыл түһүмэҕинэн, кэлэр сыл түмүктэниэр диэри 37 хаарбах дьиэ 278 кыбартыыратын көһөрүөхтээхпит. 84 кыбартыыра хаһаайына харчынан компенсацияны баҕа өттүлэринэн ыллылар», — диэтэ кини.

Билиҥҥи туругунан тутааччы 71 кыбартыыраны туттарда. 64 ыал дьиэлэннэ.

«Дьон көһөн эрэр, бүгүн түөрт ыалга күлүүс туттардым, онон 68 кыбартыыра бэрилиннэ. Өссө үс бэлэм кыбартыыра хаалла, хаһаайыттарын кытта кэпсэтии ыытыллар», — диэн Александр Хорунов чопчулаата.

Ордубут 123 кыбартыыра оҥоһуутун тутааччы 2021 сыл сэтинньи ыйыгар диэри бүтэрэр былааннаах.