Ленскэй оройуонугар мууһу хараардыы үлэтэ ыытыллар

Ленскэйгэ өрүстэргэ харыы тахсыан сөптөөх сирдэринэн мууһу хараардыы үлэтэ ыытыллар. Бу туһунан оройуон дьаһалтатын пресс-сулууспата иһитиннэрэр.

Быйыл оройуоҥҥа хаар халыҥа бэлиэтэнэр. Күһүн уһаан, өрүс мууһа кыдьымах кэмигэр турбут, кыһына эмиэ ураты тымныы буолла.

«Ньүүйэ уонна Өлүөнэ өрүстэригэр харыы тахсан, уу таһыма муҥутуурдук үрдүүр түгэнигэр Ленскэй намыһах сирдэрэ, Битиим уонна Пеледуй, Ньүүйэ өрүс кытылынааҕы Орто Наахара бөһүөлэктэрэ ууга барар кутталлаах», — диэн иһитиннэриигэ этиллэр.

Билигин Ленскэй оройуонун өрүстэригэр мууһу хараардыы оҥоһуллар. Муус харыыта тахсыан сөптөөх сирдэригэр сэрэтии үлэтэ муус устар 25 күнүгэр диэри ыытыллыаҕа. Балаһыанньа ыарыыр түгэнигэр мууһу эстэрии оҥоһуллуоҕа.

Ыйыллыбыт нэһилиэнньэлээх пууннарга гидростоптар үлэлииллэр, үп уонна матырыйаалынай саппаас тэрилиннэ.

Гидробюллетенинэн, Иркутскай уобалас Усть Кут оройуонунан, Өлүөнэ өрүс муус устар 28 күнүгэр эстэрэ күүтүллэр. Өрөспүүбүлүкэ кыраныыссатыгар кыдьымах устуута ыам ыйын бастакы күннэригэр кэлэрэ сабаҕаланар.