Ленскэйгэ бэйэ бородууксуйатын оҥорон таһаарар сыах үлэлиэҕэ

Ленскэй оройуонугар урукку үүт собуотун саҥардыы үлэтэ ыытылынна, манна олохтоох бэйэ аһын-үөлүн оҥорон таһаарар собуот үлэлиэҕэ. Бу туһунан оройуон дьаһалтатын пресс-сулууспата иһитиннэрэр.

«Гормолзавод» хайысхата толору уларыйбыта этиллэр, аны манна эттэн, балыктан, оҕуруот аһыттан уонна отонтон оҥоһуллубут ас-үөл бородууксуйата тахсар буолуоҕа. Ону тэҥэ ыраас иһэр ууну кутар пуун уонна муниципальнай бэкээрньэ үлэлиэҕэ. Сыыр оҥорор сыахтаах үүт собуота Батамай бөһүөлэгэр баар «Батамайдааҕы» ХЭУо баазатыгар тутулла турар.

«Гранит» муниципальнай тэрилтэ тырааныспарынан таһыыны хааччыйарга бэлэм, «Батамайдааҕы» ХЭУо үүтү, үүт бородууксуйатын, эти тиксэриэҕэ. Бу барыта биһиги сыахпытыгар оҥоһуллан тахсыаҕа. Оскуола оҕолорун хааччыйарга бэйэбит бэкээрньэлээх буолуохтаахпыт. Ыраас иһэр ууну кутар сыах биир бытыыкка ууну 200 солкуобайга буолбакка, холобура 50 солкуобайга кутар буолуоҕа. Оскуолалар уонна уһуйааннар хайа да кыһалҕаттан тутулуга суох, толору хаачыстыбалаах экологическэй аһылыгынан хааччыллыахтара», – диэн Ленскэй оройуонун баһылыга Жумарт Абильманов эттэ.

Оройуон баһылыга «Гарт» ХЭУо тутуу үлэлэрин болдьох иннинэ ситэрэн иһэрин бэлиэтээтэ. Бу үлэлэри ыытыыга оройуон үбүттэн уопсайа 49 мөлүйүөн солкуобай ыытыллыбыта этиллэр.

Саҥардыы үлэлэрэ 2020 сыл олунньутугар саҕаламмыттар. Бу кэм устата дьиэ ис үрдэ, муостата, истиэнэлэрэ өрөмүөннэммиттэр, саҥа ааннар уонна түннүктэр туруоруллубуттар, канализация, уу, уот ситимнэрэ уларытыллыбыттар, ону тэҥэ оҥорон таһаарар собуоттарга туһаныллар анал вентиляция систиэмэтэ таҥыллыбыт.

«Хостору хайыы үйэ наардаатыбыт. Эт уонна балык сыаҕа бары санитарнай ирдэбилинэн бэйэ-бэйэлэрин кытта сыстыспаттар. Бэкээрньэ, оҕуруот аһын уонна отон сыахтара ыйылыннылар. Ыраас иһэр ууну кутар сыах сүрүн тутууттан 20 миэтирэ тэйиччи, скважина баар сиригэр туруоҕа. Ол эбийиэк үлэтэ эмиэ түмүктэнэн эрэр. 30 миэтирэ дириҥнээх сир аннынааҕы ууну хачайдыыр скважина хайыы үйэ бэлэм турар. Ону тэҥэ сорох бородууксуйаны харайыыга ананар подвалга баар хостор өрөмүөннэрэ эмиэ бүтэн эрэр», – диэн үүт собуотун дириэктэрэ Николай Сачков кэпсээтэ.

Ленскэйдээҕи үүт собуота 2016 сылтан үлэтин тохтоппута. Саҥа сыах аһылыннаҕына оройуоҥҥа эбии 30 саҥа үлэ миэстэтэ тэриллиэҕэ.