Ленскэйгэ Нүүйэ өрүһү туоруур муостанан сырыыны быстах кэмҥэ сөргүттүлэр

Ленскэй оройуонугар өрүс эстиэр уонна понтон муоста туруоруллуор диэри Нүүйэ өрүһү туоруур тырааныспар сырыытын быстах кэмҥэ сөргүттүлэр. Бу туһунан оройуон дьаһалтатын пресс-сулууспата иһитиннэрэр.

Кыһын сабыллан турбут муоста өссө 60-с сылларга тутуллубут уонна хапытаалынай өрөмүөн ыытыллыбатах. 2020 сылга «Куттала суох уонна хаачыстыбалаах суоллар» национальнай бырайыак чэрчитинэн саҥардыыга сүүмэрдээһини ааспыт.

Муостаны сөргүтэн оҥоруу 2021 сылтан саҕаланыаҕа уонна үс сыл устата оҥоһуллуоҕа. Тутууну үбүлээһин уопсай кээмэйэ биир миллиардтан тахса солкуобай буолуоҕа.

Ол эрэн, өрүһүнэн суол сабыллар буолан, муостанан сырыыны быстах кэмҥэ, Ленскэйгэ сүрүн айан суола буоларын быһыытынан сөргүттүлэр. Бу суолунан Саха сирин хоту өттүгэр, Иркутскай уобаласка, ону тэҥэ Ленскэй олохтоохторо Миирнэйгэ баар улахан аэропортка айанныыллар.