Мүрүтээҕи уолаттар гимназиялара РФ Үөрэҕин министиэристибэтин гранын ылла

Уус Алдаҥҥа баар В.В. Алексеев аатынан Мүрүтээҕи уолаттар гимназиялара Арассыыйа Үөрэҕин министиэристибэтин гранын ылла диэн «Якутия 24» телеханаал Саха Өрөспүүбүлүкэтин Үөрэҕин уонна наукатын министиэристибэтигэр тирэҕирэн иһитиннэрэр.

Оскуола «Развитие и распространение лучшего опыта в сфере формирования цифровых навыков образовательных организаций, осуществляющих образовательную деятельность по общеобразовательным программам, имеющих лучшие результаты в преподавании предметных областей «Математика», «Информатика» и «Технология» диэн хайысхаҕа грант хаһаайына буолары ситистэ.

Бэлиэтээн суруйдахха, Арассыыйа үрдүнэн бу хайысхаҕа 47 кыайыылаах таҕыста. Грант 5 мөл. солк. тахса кээмэйдээх.

«Граны робототехникаҕа, нейротехнологияҕа, VR уонна AR анаан тэриллэри атыылаһарбытыгар олоххо киллэриэхпит. Маны таһынан, учууталлар арассыыйатааҕы уонна норуоттар икки ардыларынааҕы таһымнаах стажировкалары ааһалларыгар, уопуттарын өрөспүүбүлүкэҕэ тарҕатарбытыгар туһаныахпыт», — диэн гимназия дириэктэрэ Федор Татаринов иһитиннэрэр.

Бу иннинэ «Якутия 24» телеханаал Саха сирин үс кэллиэһэ РФ Үөрэҕин министиэристибэтин гранын кыайыылааҕа буолбуттарын туһунан иһитиннэрбитэ.