Мааска кэтии уонна санитарнай миэрэлэри тутуһуу уһуоҕа

Эпидемиологическай балаһыанньанан өрөспүүбүлүкэҕэ хааччахтааһын миэрэлэрэ уһуохтара. Бу туһунан СӨ бырабыыталыстыбатын уонна баһылыгын дьаһалтатын пресс-сулууспата иһитиннэрэр.

Иһитиннэриини Ил Дархан Айсен Николаев улуус уонна куорат уокуруктарын баһылыктарын кытта эпидемиологическай балаһыанньа мунньаҕар эттэ.

Ол курдук, маасканы кэтии, тэйиччи сылдьыы уонна дезинфекциялааһын ирдэбиллэрэ уһуохтара.

«Уопсайынан ылан көрдөххө, балаһыанньа тупсан эрэр. Хас да нэдиэлэ устата ыарыы көрдөрүүтүн таһыма түстэ. Ол эрэн, кулун тутарга-муус устарга үрдүөн сөп», — диэтэ кини.

Сааскы бырааһынньыктар чугаһаан эрэллэринэн, бары нэһилиэнньэлээх пууннар хааччахтыыр миэрэлэри тутуһууларын хонтуруолун күүһүрдэргэ ыҥырда.

«Билигин ОРВИ-нан ыалдьыы элбээтэ, сотору грипп кэлиэҕэ. Бу коронавируһунан ыалдьыбыт дьон ахсааныгар эмиэ дьайыан сөп. Дьон мааска кэтиини тутуспат буолуулара элбээтэ. Саалаҕа толору дьонноох тэрээһиннэр ыытыллыбыт түгэннэрэ баар. Маннык көҥүллэммэт», — диэн Ил Дархан бэлиэтээтэ.