Майаҕа Афанасий Степановка анаммыт искибиэри уонна пааматынньыгы арыйдылар

Мэҥэ Хаҥалас Майатыгар Сахалартан биир бастакы Социалистическай үлэ Дьоруойа Афанасий Степановка анаммыт искибиэри уонна пааматынньыгы алтынньы 25 күнүгэр үөрүүлээх быһыыга арыйдылар.

Афанасий Степанов сылгы иититиитигэр уһулуччу көрдөрүүлэрин иһин, 1948 сыллаахха Ленин уордьанынан уонна «Сиэрпэ уонна өтүйэ» кыһыл көмүс мэтээлинэн наҕараадаламмыта.

Искибиэр ортотугар Афанасий Степанов элбэх быыстапкаларга кыайбыт «Уһун сиэл» диэн ааттаах атыыр атын сиэтэн турарын тимиртэн чочуйан, Амма улууһун Сатаҕай нэһилиэгин олохтооҕо, норуот маастара Алексей Скрябин оҥордо. Пааматынньык дьоруой куоракка норуот хаһаайыстыбатын быыстапкатыгар киирэн иһэн түспүт хаартыскатыттан үтүгүннэрэн оҥоһулунна.

Искибиэргэ пааматынньыгы таһынан, Үлэ Дьоруойун дьоҥҥо билиһиннэрэр, кэпсиир стендэ оҥоһулунна. Маны таһынан эдэр көлүөнэ ыччат киирэн көрө-истэ сылдьарыгар анаан оҕолорго оонньуур балаһаакка сэргэстэһэ тутулунна. Эһиил Афанасий Степанов 100 сааһын көрсө үгүс үлэ былааннанар.

Майа киинигэр аныгылыы тутуллубут үтүө, үлэһит киһи аатын үйэтитэр өйдөбүнньүк үүнэр көлүөнэ ыччакка холобур буола туруоҕа.