Майаҕа элбэх хайысхалаах култуура киинэ аһыллыаҕа

2020 сыл бүтэһигэр Мэҥэ Хаҥалас улууһун Майа сэлиэнньэтигэр элбэх хайысхалаах култуура киинэ аһыллара күүтүллэр. Саҥа эбийиэги тутуу «Култуура» национальнай бырайыак чэрчитинэн ыытыллар.

Бырайыак быһыытынан, икки этээстээх комплекс иһигэр кэнсиэртиир, киинэ көрөр саалалара уонна үҥкүү кылааһа баар буолуоҕа. Уопсайа тутуу үс тыһыынча квадратнай миэтэрэлээх.

Саҥа комплекс культурнай тэрээһиннэр, маастар-кылаастар, үҥкүү куруһуоктара уонна спортивнай секциялар ыытылларыгар аналлаах.

Култуура киинин тутуу 2019 сыл олунньу ыйыгар саҕаламмыта.

Россия бэрэсидьиэнэ Владимир Путин «Национальнай сыаллар уонна Россия Федерациятын 2024 сылга диэри сайдыытын стратегическай соруктара» диэн ыйааҕар олоҕуран «Култуура» национальнай бырайыак оҥоһуллубута.

2019 сылга бырайыак чэрчитинэн Уус Алдан улууһун Сыырдаах уонна Горнай улууһун Дьиикимдэ сэлиэнньэлэригэр култуура дьиэлэрэ тутуллубута.