Майа сэлиэнньэтигэр Ходулов аатынан култуура киинэ үлэҕэ киирдэ

Мэҥэ Хаҥалас улууһун Майа сэлиэнньэтигэр Дмитрий Ходулов аатынан араас хайысхалаах култуура-сынньалаҥ комплекса үлэҕэ киирдэ.

«Нэһилиэнньэ Ходулов аатынан тыйаатыр маннык дьоһун дьиэлэниэн баҕарбыта ыраатта. Тутуу 2019 сыл олунньутуттан саҕаламмыта. Манна тыйаатыр салайыытынан араас хайысханан үлэ ыытыллыаҕа», — диэтэ Үүнэр көлүөнэ пуондатын дириэктэрэ Владимир Егоров.

Эбийиэккэ 300 миэстэлээх көрөөччү саалата, 50 миэстэлээх киинэ тыйаатыра, үс үҥкүү, фитнес саалалара уо.д.а.

Саха АССР төрүттэммитэ 100 сылыгар анаан Намҥа, Баатаҕайга, Зырянкаҕа уонна Бороҕоҥҥо култуура кииннэрэ тутуллуохтара. Санатан эттэххэ, ахсынньы 25 күнүгэр Аллараа Бэстээххэ бассейнаах саҥа спорткомплекс аһылынна.