Мамиашвили: Саха сирэ дойду сүүмэрдэммит хамаандатыгар күүстээх тустууктары таһаарар

Спортивнай тустуу федерациятын бэрэсидьиэнэ Михаил Мамиашвили дойду сүүмэрдэммит хамаандатыгар спортсменнары бэлэмнииргэ Саха сирин кылаатын, сыратын бэлиэтээтэ. Бу туһунан СӨ баһылыгын уонна бырабыыталыстыбатын пресс-сулууспата иһитиннэрдэ.

«Уонунан сылларга саха тустууктара кыайыыны ситиһэргэ олук ууран кэллилэр. Саха сирэ Россия сүүмэрдэммит хамаандата тэриллэригэр сүрүн күүс буолбута, билигин да, инникитин да оннук буолуо диэн эрэнэбит», — диэн турнир аһыллыытыгар Мамиашвили эттэ.

Федерация Коркин аатынан норуоттар икки ардыларынааҕы турнир ыытылларыгар улахан суолта уурарын иһитиннэрдэ. Көҥүл тустууга бу биир сүрүн күрэхтэһии буоларын бэлиэтээтэ.

Дмитрий Коркин кэриэһигэр норуоттар икки ардыларынааҕы көҥүл тустуу 12-с турнира алтынньы 11-13 күннэригэр ыытыллар. «Саха» НКИХ ханааллара, «Тэтим» араадьыйа тустуу турнирын быһа эфиргэ көрдөрөллөр.