«Манчаары оонньууларын» балаһыанньатын уларытарга этии киллэрдилэр

Күрэхтэһиигэ кыттар улуустар бөлөхтөрүн рейтинг быһыытынан буолбакка, олохтоох нэһилиэнньэ ахсаанынан араарыы, ону тэҥэ кыттарга киирэр быраап хонтуруолун кытаатыннарар туһунан XXI «Манчаары оонньуулара» спорт национальнай көрүҥнэригэр спартакиада тэрийэр кэмитиэтин сүбэ мунньаҕар этии киллэрдилэр. Бу туһунан «Спорт Якутии» иһитиннэрэр.

Мунньахха кыттар улуустары рейтинг нөҥүө буолбакка, олохтоох нэһилиэнньэ ахсаанынан наардааһын туһунан этии киирдэ. Маҥнайгы бөлөххө — биэс тыһыынчаҕа диэри ахсааннаах нэһилиэнньэлээх улуустар, иккис бөлөххө — 5-тэн 15 тыһыынчаҕа диэри, үһүс бөлөххө — 15-тэн 20 тыһыынчаҕа диэри, төрдүс бөлөххө — 25 тыһыынчаттан элбэх ахсааннаах нэһилиэнньэлээх улуустар. Сүбэ мунньах кыттыылаахтара бары кэриэтэ бу этиини өйөөтүлэр.

Спортсменнар дуогабар нөҥүө кытталларын уонна кыттарга киирэр быраап ылыыларын боппуруоһугар мөккүөр таҕыста. Мунньах кыттааччылара хонтуруолу кытаатыннарар уонна сымыйа докумуоннаах спортсменнары кытыннарбат туһунан этии киллэрдилэр.

«Инники сылларга элбэх спортсмен сымыйа прописка оҥотторон, сыһыана суох улуустарын аатыттан кыттааччы», – диэн этиллэр.

Дуогабар нөҥүө кыттыыны хас эрэ ахсааҥҥа диэри аччатар, эбэтэр бу систиэмэни олох суох оҥорор туһунан этии киирдэ. Бу боппуруоһу бастакы уочарат көрүү уонна ирдэнэр миэрэни ылыы былааннанар.

Ону тэҥэ оонньуулар ыытыллар кэмнэригэр тас дойдулартан кэлэр туристарга төрүт спорт көрүҥнэрин кытары билиһиннэрэр анал туристическай бырагырааманы тэрийии туһунан боппуруос киирдэ.

Тэрийэр кэмитиэт уонна СӨ спорт министиэристибэтэ киирбит этиилэри уонна боппуруостары барыларын кэлэр ыйдарга быһаарыа.