«Манчаары оонньууларын» көрсө Бэрдьигэстээххэ спортивнай эбийиэктэр тутуллуохтара

НВК САХА – Ил Дархан Айсен Николаев Горнай Бэрдьигэстээҕэр спорт төрүт көрүҥнэригэр XXI «Манчаары оонньуулара» спартакиадатын тэрийэр бөлөҕүн кытта мунньахтаата. Бу туһунан Ил Дархан уонна бырабыыталыстыба пресс-сулууспата иһитиннэрэр.

Күрэхтэһиини көрсө 50 миэстэлээх интернаттаах ытыы комплекса, элбэх функциялаах спортивнай киин тутуллуохтаах уонна 4000 миэстэлээх стадиону чөлүгэр түһэриэхтэрэ.

Маны таһынан суолга асфальт тэлгиэхтэрэ, хаарбах туруктаах дьиэлэртэн дьону көһөрүү бырагырааматын чэрчитинэн үлэ барыаҕа.

«Былааннаммыт эбийиэктэр бары тыа сиригэр улахан суолталаахтар, бырайыак үлэтин бүтэрэн, сыл бүтүөр диэри аукцион тэрийэн, оонньууларга толору бэлэм буолуохха наада», — диэбит Айсен Николаев.

Ил Дархан улуус олохтоохторо күрэхтэһии тэрээһинигэр көхтөөх кыттыыны ылалларыгар ыҥырда.