Мария Туласынова: култуура уонна тыл — биһиги дойдубут ураты баайа

«Таатта» музей-заповедник үрдүкү научнай үлэһитэ Мария Туласынова бэлиэтииринэн, Россия Төрүт сокуонугар киирэр уларытыылар дойду култуурата сайдарагар төрүөт буолуохтара.

«Дойдубут салгыы сайдыыта култуураттан — биһиги олоҕурбут сыаннастарбытыттан уонна Россия сүду суолталаах саппаас баайыгар олоҕуран ситиһиллиэн сөп. Биһиги өбүгэлэрбититтэн бэриллибит баай билиибит уонна кэнэҕэски ыччаппытыгар хаалларар нэһилиэстибэбит барыта литератураҕа, музыкаҕа, архитектураҕа, живописька уурулла сылдьар», — диэн тоһоҕолоон эттэ.

Кини этэринэн, судаарыстыбанан араҥаччыланар култуура — элбэх омуктаах биир сомоҕо дойдубут ураты баайынан буолар. Төрүт сокуоҥҥа киирэр көнөрүүлэр култуура салаата сайдарыгар саҥа тирэхтэри биэриэхтэрэ.

Санатан эттэххэ, Россия Төрүт сокуонугар киирэр уларытыылары талыы бүтүн Россиятааҕы куоластааһына от ыйын 1 күнүгэр ыытыллар. Саха сиригэр 800-тэн тахса куоластыыр учаастак үлэлиэҕэ. Коронавирус инфекцията тарҕаныытын сэрэтэр бары миэрэлэр тутуһуллуохтара.