Мас тардыһыы Аан дойдутааҕы чөмпүйэнээтэ коронавирустан сылтаан көһөрүлүннэ

2020 сыл бэс ыйыгар Дьокуускай куоракка ыытыллыахтаах мас тардыһыы Аан дойдутааҕы чөмпүйэнээтэ коронавирустан сылтаан көһөрүлүннэ. Бу туһунан «Спорт Якутии» иһитиннэрэр.

СӨ спортка министиэристибэтигэр мас тардыһыыга норуоттар икки ардыларынааҕы федерация кыттыылаах холбоһуктаах мунньах ааста. Өрөспүүбүлүкэҕэ 2020 сылга 22 спортивнай тэрээһин уонна үс норуоттар икки ардыларынааҕы таһымнаах тэрээһин ыытыллара былааннанара этиллэр.

«Бу тэрээһиннэртэн сүрүн күрэхтэһиинэн 2020 сыл бэс ыйыгар Дьокуускайга ыытыллыахтаах Аан дойдутааҕы мас тардыһыы чөмпүйэнээтэ буолар. Күрэхтэһиигэ бары ыйааһын категорияларынан дьахталлар уонна эр дьон ыккардыларыгар 350-тан тахса спортсмен уонна тренер кыттыыны ылара былааннанара», — диэн мас тардыһыы норуоттар икки ардыларынааҕы федерациятын генеральнай сэкэрэтээрэ Арнольд Мохов эттэ.

Баар дааннайдарынан, кыттыыны ылыахтаах 49 дойдуттан бэс ыйыгар диэри улахан аҥарыгар коронавирус ыарыыта тарҕаныан сөп. Билиҥҥи туругунан хайыы үйэ 31 дойдуга коронавируһунан ыалдьбыт дьон бааллара билиэтэнэр.

Мунньах кыттыылаахтара сиһилии быһаарсан уонна санааларын атастаһан баран коронавирус ырыытыттан олохтоммут усулуобуйаҕа тоҕоостоох кэм кэлиэр диэри күрэхтэһиини көһөрөр туһунан быһаарыыны ылыннылар.