Мэҥэ Хаҥалас тыатын хаһаайыстыбатын тэрилтэлэрэ «Бөртө» собуотугар харчынан көмө оҥордулар

Мэҥэ Хаҥалас тыатын хаһаайыстыбатын тэрилтэлэрэ баһаартан эмсэҕэлээбит «Бөртө» сылгы собуотугар 175 тыһыынча суумалаах харчынан көмө оҥордулар. Бу туһунан СӨ Тыа хаһаайыстыбатын пресс-сулууспата иһитиннэрэр.

Мэҥэ Хаҥалас улууһун баһылыгын бастакы солбуйааччыта Семен Потапов, тыа хаһаайыстыбатын тэрилтэлэрин аатыттан, сылгы собуотун дириэктэригэр Александр Павловка харчынан көмөнү туттарда. Кини Саха сирин тыа хаһаайыстыбатын тэрилтэлэрин түмсэн көмөлөһөллөрүгэр ыҥырда.

««Бөртө» сылгы собуота Саха сирин агропромышленнай комплексын киэн туттуута уонна тыа хаһаайыстыбатын тэрилтэлэрин холобур оҥостор тэрилтэтэ. Хаҥалас улууһа тыа хаһаайыстыбатын оҥорон таһаарар тэрилтэлэригэр куруутун күүс-көмө буолар, онон ыарахан түгэҥҥэ көмөбүтүн утары уунабыт. Санааҕытын түһэримэҥ! Уопсай көмөнөн тэрилтэ атаҕар туруоҕа дии саныыбыт», — диэтэ кини.

Сылгы собуотун салайааччыта «Тумул», «Солооһун», «Хорообут», «М.Егорова» уонна «Томтор» тыа хаһаайыстыбатын, «Хоту», «Павловскайдааҕы үүт собуота», «Саха төрүт аһа» оҥорон таһаарар тэрилтэлэригэр, тыа хаһаайыстыбатын салайааччыларыгар Попов Аркадий Николаевичка, Жирков Егор Гаврильевичка, маны таһынан, Мэҥэ Хаҥалас улууһун тыатын хаһаайыстыбатын управлениетыгар махталын биллэрдэ.

Санатан эттэххэ, тохсунньу 6 күнүгэр конезавод 408 квадратнай миэтэрэ иэннээх гарааһыгар баһаар буолан, 12 тиэхиньикэ, ол иһигэр биэс чааһынай дьон тырааныспара уокка былдьаммыта.

Уопсай хоромньу 12,3 мөлүйүөн солкуобайга тэҥнэһэр. Билиҥҥи туругунан, баһаар биричиинэтэ быһаарыллар.

Эрдэ иһитиннэриллибити санатан эттэххэ, конезаводка үс тыраахтар атыыласпыттара. Хаҥалас улууһун баһылыга Олег Иринеев гараас аҕыйах кэм иһигэр тутулларын туһунан иһитиннэрбитэ. Тутуу сорох чааһын улуус дьаһалтата уйунарын эппитэ.