Мэҥэ Хаҥалас улууһугар саҥа култуура киинэ тутуллуоҕа

РФ бэрэсэдьиэнэ Владимир Путин көҕүлээбит «Култуура» национальнай бырайыак чэрчитинэн Мэҥэ Хаҥалас улууһун Аллараа Бэстээх бөһүөлэгэр аныгы култуура киинэ тутуллуоҕа. Бу туһунан СӨ бырабыыталыстыбатын уонна баһылыгын дьаһалтаттын пресс-сулууспата иһитиннэрэр.

Саҥа тутуллар киин архитектурнай быһаарыыта уонна сирин оҥоһуутун үлэтэ ыытылынна. Култуура киинин тутуутугар уопсайа 147, 7 мөлүйүөн солкуобай көрүллүөҕэ.

«Алтынньы 20 күнүгэр премьер-миниистир Михаил Мишустин Уһук Илиҥҥи уокурук регионнарыгар уонна куораттыы тииптээх бөһүөлэктэри үбүлээһин федеральнай бырагырааматыгар илии баттаабыта, ол иһигэр Аллараа Бэстээх бөһүөлэгэ киирдэ», — диэн Саха сирин бырабыыталыстыбатын бэрэссэдээтэлин э.т. Сергей Местников бэлиэтээн эттэ.

Саҥа киин бөһүөлэк киинигэр, Ленин аатынан уулуссаҕа тутуллуоҕа. Тутууга анал-кылаастар, музейга, быыстапкаҕа анаммыт сир, 200 миэстэлээх саала, подсобнай хос уонна кафе-буфет баар буолара былааннанар. Тутуу 2022-2023 сылларга тутуллуоҕа.

Санатан эттэххэ, РФ премьер-миниистирэ Михаил Мишустин Уһук Илин култуура кииннэрин тутар туһунан бырабыыталыстыба уурааҕар илии баттаабыта.