Мэҥэ Хаҥаласка ойуур баһаара 24 туонна оту сиэтэ

Мэҥэ Хаҥалас улууһун Балыктаах сэлиэнньэтин чугаһыгар балаҕын ыйын 11 күнүгэр бэлиэтэммит ойуур баһаарын уота 24 туонна оту сиэтэ.

Дмитрий уонна Егор Захаровтар чааһынай кэтэх хаһаайыстыбаларыгар бэлэмнээбит отторо уокка былдьанна. Барыллаан ааҕыынан, хоромньу 120 тыһыынча солкуобайга тэҥнэһэр. Захаровтар хаһаайыстыбаларыгар 25 төбө ынах сүөһүлээхтэр уонна биэс сылгылаахтар.

Ойуур баһаара бастаан Матта сэлиэнньэтин чугаһыгар бэлиэтэммит, кэлин Балыктаах сэлиэнньэтин чугаһыгар баар Дойду диэн сиргэ тиийэ тарҕаммыта.

Ойуур уота турбут сүрүн биричиинэтинэн сир аннынааҕы липпэ умайыыта буолуон сөбө сабаҕаланар.