Мэҥэ Хаҥаласка ойуур баһаара оттуур ходуһаны ылла

Мэҥэ Хаҥалас улууһун Матта сэлиэнньэтин чугаһыгар ойуур баһаара оттуур ходуһаны ыла сырытта.

Балаҕан ыйы 11 күнүгэр Матта сэлиэнньэтиттэн 9,5 килэмиэтир тэйиччи баар Барын Табы сиргэ ойуур баһаара көһүннэ.

«Уот түөрт га иэннээх ойууру ылла уонна үс га иэннээх ходуһаны. Бу сиргэ Балыктаах олохтоохторо оттууллар», — диэн улуустааҕы биир кэлим диспетчерскэй сулууспа тириэрдэр.

Баһаар бүгүн, балаҕан ыйын 13 күнүгэр умуруорулунна. Миэстэтигэр уот тахсыбыт биричиинэтин быһарар дьаһаллар ыытыллаллар.