Михаил Рожин «Новая звезда» ырыа куонкуруһугар полуфиналга таҕыста

«Новая звезда 2020» Бүтүн Россиятааҕы ырыа куонкуруһугар Саха сирин бэрэстэбиитэлэ Михаил Рожин полуфиналга ааста.

«Күндэлэс» диэн тус бэйэтэ айбыт ырыатын толорон саамай үрдүк 100 баалы ылан сүүмэрдиир түһүмэҕи ситиһиилээхтик ааста.

Михаил Рожин 29 саастаах, ырыанан 2008 сылтан дьарыктанар. «Дюбун» этнокультурнай киин уус-уран салайааччытынан үлэлиир. Инники Опера уонна балет тыйаатырыгар хор артыыһынан үлэлии сылдьыбыта. Араас вокальнай куонкурустар лауреаттара.

«Михаил Рожин Саха өрөспүүблүкэтин ыраах хоту улууһуттан төрүттээх, ол эрэн муусукаҕа таптала кинини Дьокуускай куоракка онтон Москваҕа аҕалбыта. Кини төрөөбүт тылынан ырыа айан суруйар. Бэйэтин ырыаларыгар төрөөбүт дойдутун кэрэ айылҕатын хоһуйан кыыска тапталын туһунан ыллыыр», — диэн күрэхтэһии официальнай сайтыгар этиллибит.