Мииринэй олохтооҕо сэрэҕэ суох быһыыттаан трансформаторы саанан ыппыт

Мииринэй оройуонун олохтооҕо сэрэҕэ суох саанан ытан, трансформатор тымнытар радиаторын алдьаппыт. Бу туһунан Россия ис дьыалаҕа министиэристибэтин Саха сиринээҕи салаатын пресс-сулууспата иһитиннэрэр.

«Миэстэтигэр үлэлээбит суһал-силиэстийэлиир бөлөх барыллаан быһаарбытынан, 55 саастаах олохтоох эр киһи гаражтар боксаларыгар сылдьан, сэрэҕэ суох быһыыттан саатын подстанция диэки туһаайан баран ытыы оҥорбут. Ол түмүгэр трансформатор тымнытар радиатора алдьаммыт», — диэн этиллэр.

Уот арахсыыта тахсыбатаҕа бэлиэтэнэр. Билиҥҥи туругунан бэрэбиэркэ ыытыллар, ол кэннэ туттулла сылдьар сокуоҥҥа олоҕуран тус быһаарыы ылыллыаҕа.

Инники этиллибитинэн, Мииринэй оройуонугар энергетиктар саанан ытыы түмүгэр алдьаммыт трансформаторы чөлүгэр түһэрии үлэтин ыыталлар.