Мииринэй оройуонугар саха сүөһүтүн иитиини сөргүтэллэр

Мииринэй оройуонун Сүлдьүкээр сэлиэнньэтигэр сүөһү ахсаанын сөргүтүүгэ 150-чэ төбө саха ынаҕын аҕаллылар. Бу туһунан РИА Новости иһитиннэрэр.

Сүлдьүкээргэ «Саха сүөһүтэ» («Якутский скот») генофонду сөргүтэр судаарыстыбаннай тэрилтэ салаата баар. Тэрилтэ үлэһиттэрэ сүөһү ахсаанын элбэтиигэ үлэлииллэр.

Ынахтары Үөһээ Бүлүү, Амма, Горнай уонна Нам улуустарыттан аҕаллылар. Айаҥҥа кинилэри бэтэринээрдэр арыаллаатылар.

Манна сибиэһэй үүт уонна эт бородуукталарын оҥорон таһаарыы тэриллэрэ былааннанар. Исписэлиистэр бэлиэтииллэринэн тыа хаһаайыстыбатын бородуукталара Мииринэй оройуонун иһигэр эрэ буолбакка, атын улуустарга уонна өрөспүүбүлүкэ тас өттүгэр хамаҕатык барыахтара.