Миирнэйгэ икки саанан ытыллыбыт киһи өлүгэ көһүннэ

Миирнэй оройуонун Ботуобуйатааҕы экспедиция баазатыгар төбөлөрүгэр саанан ытыыллыбыт икки 57 уонна 40 саастаах эр дьон өлүктэрэ көһүннэ. Бу туһунан Россия силиэстийэлиир кэмитиэтин өрөспүүбүлүкэтээҕи салаатын пресс-сулууспата иһитиннэрэр.

«Миирнэй үс олохтооҕо ыраах сытар тиийэргэ уустук сиргэ бултуу барбыттар. Үһүс эр киһи кэпсииринэн, бииргэ арыгы иһии кэнниттэн кини утуйа барбыт. Сарсыарда туран атастарын саанан ытыллыбыт өлүктэрин булбут», – диэн этиллэр.

Туоһу киһи тута быраабы харыстыыр уорганнарга тыллаабыт. Миирнэй куораттан 154 килэмиэтир тэйиччи турар быһылаан тахсыбыт сиригэр, силиэстийэлиир суһал бөлөх бөртөлүөтүнэн тиийбит.

Оннугар көрүү ыытылынна, саалар уонна ботуруоннар тутулуннулар. Россия холуобунай коддексын «Өлөрүү» ыстатыйатынан холуобунай дьыала тэрилиннэ. Экспертэр анал чинчийиилэрэ ананна, доппуруостааһын уонна да атын силиэстийэлиир үлэлэр ыытыллаллар.