«Мин үрдүбэр күн хаһан да киирбэт» сахалыы киинэни нууччалыы тылбаастаатылар

«Мин үрдүбэр күн хаһан да киирбэт» киинэни Москва куоракка нууччалыы тылбаастаатылар. Киинэҕэ Степан Петров «Гарри Поттер» киинэтигэр Сириус Блэгы саҥардыбыт Борис Токарев-Хрунов куолаһынан, оттон Иван Константинов Джесси Айзенбергы саҥардыбыт Прохор Чеховскай куолаһынан саҥарыахтара.

Артыыстары куоластарынан эрэ буолбакка, киинэ дьоруойдарын майгытын-сигилитин көрөн талбыттара.

Нууччалыы тылбаастаммыт киинэни Казахстаҥҥа уонна Кыргызстаҥҥа сыаналаабыттара. «Сахафильм» хаамандата киинэни быһа-атыыга интерниэккэ таһаарар былааннаах.

«Киинэ нууччалыы тылбаастанан иккис тыыннанна. Араас дойду сэҥээриитин ылла уонна билигин быһа-атыыга таһаарар туһунан кэпсэтии барар», — диэтэ «Сахафильм» хампаанньа салайааччыта Дмитрий Шадрин.

Саха сирин олохтоохторо тылбаастаммыт киинэни олунньу 27 күнүттэн көрүөхтэрин сөп.