«Мин төннүөм» оскуолатааҕы патриотическай бырайыак күрэхтэһиитэ саҕаланна

Улуу Кыайыы 75 сылыгар анаммыт «Мин төннүөм» патриотическай бырайыактар күрэхтэһиилэригэр оскуола үөрэнээччилэрин хамаандалара кыттыыны ылаллар. Куонкурус Ил Дархан Айсен Николаев көҕүлээбит «Биһиги Арасыыйа кэскилэбит!» бырайыагын чэрчитинэн ыытыллар. Бу туһунан СӨ үөрэх уонна наука министиэристибэтин пресс-сулуспата иһитиннэрэр.

Куонкуруһу министиэристибэ, «Саха» көрдөрөр-иһитиннэрэр хампаанньа, «Саха ыччата» ресурснай киин уонна One click Yakutia портал ыытар.

Кыттааччылар ыам ыйын 3 күнүгэр диэри Василий Иванов «Мин төннүөм» кинигэтин матыыбынан видеобырайыак оҥоруохтаахтар. Кыайыылааҕы One click Yakutia порталга куоластааһын быһаарыа.

Бастакы миэстэни ылбыт оскуола 70 тыһыынча солкуобайга көмпүүтэр атыылаһарга сертификаттарынан наҕараадаланар. Иккис уонна үһүс миэстэлэргэ «Саха ыччата» ресурснай киин «Кэскил» лааҕырыгар путевка бэриллэр.

Куонкурус балаһыанньатын сиһилии министиэристибэ сайтыгар көрүөххэ сөп.