Мирнэй оройуонун Айхал бөһүөлэгин баһаарынай чааһыгар хапытаалынай өрөмүөн ыытыахтара

2020 сылга Мирнэй оройуонун Айхал бөһүөлэгин 6-с №-дээх баһаарынай чааһыгар хапытаалынай өрөмүөн ыытыахтара. Бу туһунан «Якутия 24» ханаал иһитиннэрэр.

Үлэни ыытыы электроннай аукционун Россия ыксаллаах быһыыга-майгыга министиэристибэтин баһаары утары судаарыстыбаннай сулууспата биллэрдэ. Бэрэбиэркэ түмүгүнэн, эргэрии 72%-ҥа тэҥнэстэ.

«Административнай тутуу уонна баһаарынай депо кырыыһата тэстэр, кырыыһа уларыйара булгуччу наада», — диэн госзакупка докумуонугар этиллэр.

Ону тэҥэ ититии систиэмэтин, радиатордары, ааннары, түннүктэри уларытыы, вентиляция систиэмэтин туруоруу уонна тутуу иһигэр өрөмүөн ыытыллара ирдэнэр.

Үлэ 14,550 мөлүйүөн солкуобайга сыаналанна. 2020 сыл сэтинньи 30 күнүгэр диэри үлэ түмүктэнэрэ былааннанар.