Миирнэйгэ этиҥнээх ардахтан эмсэҕэлээбит уот ситимин сөргүттүлэр

Миирнэйгэ, атырдьах ыйын 11 күнүгэр, күүстээх тыаллаах, этиҥнээх ардахтан эмсэҕэлээбит уот ситимин энергиэтиктэр сөргүттүлэр. Бу туһунан «Якутскэнерго» пресс-сулууспата иһитиннэрэр.

«Араарыллыбыт уот ситимин улахан аҥара сарсыныгар холбонно. Бэҕэһээ, атырдьах ыйын 13 күнүгэр, Миирнэйгэ энергиэтиктэр уот ситимин эмсэҕэлээбит тирэхтэрин салгыы уларыттылар. 18:05 чааска үлэ барыта түмүктэннэ, уот холбонно», — диэн иһитиннэриигэ этиллэр.

Сөкүүндэҕэ 15 миэтэрэ түргэннээх тыаллаах, сорох сиринэн тобурахтаах, этиҥнээх ардахтан Миирнэй, Ленскэй микрооройуоннарыгар, Бэчинчэ, Сүлдьүкээр бөһүөлэктэригэр уотунан хааччыйыы тохтоото. 0,4 кВ күүрүүлээх 10 уот ситимэ уонна 6/10 кВ кылаастаах салгынынан уот ситимэ эмсэҕэлээтэ.

Сөргүтүү үлэтэ түүннэри ыытылынна, 30 киһи кытынна уонна 15 тиэхиньикэ туттулунна.