Монголия VII «Азия оҕолоро» оонньууну ыытарын бобуо

«Азия оҕолоро» норуоттар икки ардыларынааҕы спортивнай оонньуу кэмитиэтэ Монголияны эбээһинэһин ситэри толорботоҕун иһин, VII «Азия оҕолоро» оонньууну ыытар бырааба быһыа. Бу туһунан кэмитиэт генеральнай дириэктэрэ Владимир Максимов иһитиннэрдэ.

«Онньууну ыытыы быраабын быһыы сүрүн биричиинэтинэн, Монголия тэрийээччи дойду ирдэбилигэр сөп түбэспэтэ буолар. Спортивнай бырагыраама оҥоһуллубатах, тутуллуохтаах спортивнай эбийиэктэр суохтар уонна тутуллар сибикилэрэ суох, тэрээһиннэри ыытар, ону тэҥэ кытааччылары олохтуур сирдэр бэлэмэ суохтар», — диэн «Азия оҕолоро» норуоттар икки ардыларынааҕы спортивнай оонньуу кэмитиэтин генеральнай дириэктэрэ эттэ.

Ону кытта, Азия олимпийскай кэмитиэтин сайтыгар, 2020 сыл балаҕан ыйын 13-19 күннэригэр Монголияҕа ЮНЕСКО көҕүлээһининэн маҥнайгы норуоттар икки ардыларынааҕы ыччат «Күөх» оонньуута ыытылларын туһунан этиллэр.

«Монголия өттө куһаҕаннык быһыыламмыт. «Күөх» оонньуу ыытыллалларын туһунан, сонуну киэҥник тарҕатар сириэстибэлэртэн биллибит. Тэрийэр дойдуттан быһаарыы киирэ илик. Бу оонньуу торумун билбэппит, ол эрээри биһиги санаабытыгар, тэрээһин буоларын туһунан иһитиннэрии хойутаан саҕаланна. Оонньууну үрдүк таһымнаах ыытыыга бэлэмнэниигэ аҕыйах бириэмэ хаалар», — диэн Владимир Максимов бэлиэтээтэ.

Тохтотуу үлэтэ атырдьах ыйыттан саҕаламмыт диэн бэлиэтэнэр. Санаттахха, VII «Азия оҕолоро» норуоттар икки ардыларынааҕы спортивнай оонньуу Улан Батор куоракка 2020 сыл атырдьах ыйыгар буолуохтаах.