Мотуор арыытын туругун быһаарар лабораторнай установканы оҥордулар

Хотугулуу-Илиҥҥи федеральнай үнүбэрсиэт автодорожнай факультетын бүтэрбит Константин Пинигин мотуор арыытын динамическай туругун быһаарар лабораторнай установканы оҥордо. Бу туһунан үрдүк үөрэх кыһатын пресс-сулууспата иһитиннэрэр.

«Стокс ньыматынан мотуор арыытын динамическай туругун быһаарар лабораторнай установка АДФ устудьуоннара практическай дьарык ыыталларыгар кыах биэрэр. Ону таһынан, суот-эксперимент ньыматынан фактическай дааннайдары ылыахха сөп», — диэтэ автосервис уонна тырааныспары туһаныы кафедратын уһуйааччыта, научнай салайааччы Евсей Анисимов.

Константин чинчийиини үөрэҕин түмүктүүр научнай үлэтигэр ыытта. Кини Дьокуускайга атыыланар арыылар практическай рекомендацияларын оҥордо. Маны таһынан, олоххо туттуллуутугар динамическай туруга уларыйыытын көрдөрдө. Константин этэринэн, үгүс массыыналаах дьон ханнык арыы тырааныспарга барсарын билбэт.

«Арыытын сөпкө таллахха, тыйыс усулуобуйаҕа мотуор өр сулууспалыан сөп», — диэтэ кини.

Константин этэринэн, саҥа массыыналарга, 5w-30 курдук, синтетическай арыынан туттар ордук. Оттон сүүрбүт, урукку сыллаах тырааныспарга 5w-40 синтетическай аҥардаах арыыны кутар барсарын туһунан этэр.

«Чинчийии салгыы кафедраҕа ыытыллыаҕа. Ылбыт билиибин олохпор хайаан да туһаныам», — диэтэ выпускник.

Константин Пинигин чинчийиитэ Бүтүн россиятааҕы түмүктүүр үлэлэр истэригэр үһүс миэстэни ылла. Кини үлэтин «Организация и технология ТО и ремонта ТТМиК» хайысхаҕа көмүскээтэ.