Муомаҕа остуолба сууллан олохтоохтор уота суох хаалбыттар

Муома улууһугар биллибэт суоппар остуолба тирэҕин түҥнэри көтөн Соболоох сэлиэнньэтин олохтоохторо уота суох хаалбыттар. Бу туһунан «Сахаэнерго» хампаанньа пресс-сулууспата иһитиннэрэр.

Саахал «Соболоох – Победа» хайсханан уот ситимигэр ахсынньы 29 күнүгэр олохтоох бириэмэнэн 00:50 чааска тахсыбыт. Быһылаан түмүгэр Соболоох, Победа уонна Суон Тиит сэлиэнньэтин олохтоохторо уота суох хаалбыттар.

Оннугар тиийбит энергетиктэр биир остуолба тирэҕэ биллибэт тырааныспарынан тарааннаммытын быһаарбыттар. Исписэлиистэр Победа уонна Суон Тиит сэлиэнньэлэрин уот ситимигэр холбообуттар. Чөлүгэр түһэрэр үлэлэр ыытыллар кэмнэригэр Соболооххо саппаас источнигы тириэрдибиттэр.

Сэлиэнньэҕэ 249 киһи олороро этиллэр. Быһылаан чахчытынан полицияҕа сайабылыанньа суруллубут.