Муомаҕа уонна Дьааҥыга муус суолунан сырыы аһылынна

Муома уонна Дьааҥы улуустарыгар 10 уонна 20 тоннаҕа диэри ыйааһыннаах массыыналарга кыһыҥҥы суолунан сырыы көҥүллэннэ. Бу туһунан СӨ тырааныспар уонна суол хаһаайыстыбатын министиэристибэтин пресс-сулууспата иһитиннэрэр.

«Муома улууһун «Буруустаах – Сааһыыр»  учаастагар мууһунан сырыы 20 тоннаҕа диэри ыйааһыннаах массыыналарга аһылынна. Суолу оҥорууга сэттэ суол үлэһитэ уонна үс тиэхиньикэ кыттыыны ылла», — диэн этиллэр.

Дьааҥы улууһугар «Баатагай – Чөрүмчэ – Сайдыы» учаастакка кыһыҥҥы суол таһаҕаһы уйуута 10 тоннаҕа диэри үрдээтэ.

Ону тэҥэ «Бүлүү» айан суолун 510-с килэмиэтириттэн Мукучу сэлиэнньэтигэр тиийэр «Лүүчүн» айан суолунан сырыы аһылынна.

Сэтинньи 19 күнүгэр «Кэбээйи» айан суолугар Аһыма сэлиэнньэтиттэн Түгүөнэ үрэххэ диэри кыһыҥҥы суолунан, биэс тоннаҕа диэри ыйааһыннаах массыыналарга сырыы аһыллыа.