Муомаҕа уот ситимин сөргүтүүгэ икки нэдиэлэ курдук барыа

«Сахаэнерго» Муома улууһугар ойуур баһаарыттан эмсэҕэлээбит үрдүк күүрүүлээх уот ситимнэрин сөргүтүү үлэлэрин ыытар. Бу туһунан хампаанньа пресс-сулууспата иһитиннэрэр.

Энергиэтиктэр «Соболоох — Победа» хайысханан 10 кВ кыамталаах уот ситимин сирийэн көрүү кэмигэр 30 остуолба эмсэҕэлээбитин быһаардылар – изолятордар быстан түһүүлэрэ, крюктар уонна боруобаттар быстыылара.

Соболоох уонна Буор Сыһыы бөһүөлэктэрэ саппаас источниктартан толору уотунан хааччыйыллан тураллара этиллэр.

Бүгүн, атырдьах ыйын 13 күнүгэр электромонтердар сөргүтүү үлэлэригэр туруннулар. Исписэлиистэр сыаналааһыннарынан, үлэлэр икки нэдиэлэ курдук ыытыллыахтара.

Санатар буоллахха, бөдөҥ ойуур баһаара «Соболоох – Победа» хайысханан уот арахсыытын төрүөтүнэн буолбута. Уот уонна буруо өр кэм устата уот ситимин көрүүнү оҥорууга мэһэйи үөскэтэллэрэ.