Муома улууһугар мобильнай биригээдэ тэриллиэҕэ

Муома улууһугар оттооһун хаамыытыгар ойуур баһаардара мэһэйдээннэр, былааны толорууга мобильнай биригээдэ тэриллиэҕэ. Бу туһунан СӨ баһылыгын уонна бырабыталыстыбатын дьаһалтатын пресс-сулууспата иһитиннэрэр.

Бу туһунан улуус баһылыга Иван Павлов атырдьах ыйын 12 күнүгэр Ил Дархан Айсен Николаевы кытта көрсүһүү кэмигэр иһитиннэрдэ.

Былааннаммыт 1290 туонна оттон, 902 туонна бэлэмнэннэ, улуус өрөспүүбүлүкэ үрдүнэн былааны толорууга алтыс миэстэҕэ сылдьар.

«Ойуур баһаардарын умулларыы үлэтиттэн сылтаан оттооһун кылгас кэмҥэ тохтуу сырытта. Билигин СӨ тыатын хаһаайыстыбатын министиэристибэтин кытта мобильнай биригээдэ тэрийиитин боппуруостарынан үлэлиибит, хаалбыт кэм устата былааммыт 80-85 %-нын толорор кыахтаахпыт», – диэн эттэ.

Быйыл сайын Муома нэһилиэнньэлээх пууннарыгар кутталлаах быһыыны олохтообут биэс улахан ойуур баһаара умуруорулунна.

Көрсүһүү кэмигэр Иван Павлов улууска ойуур баһаардарын утары охсуһууга туттуллар анал тиэхиньикэни, баһаары сэрэтэр иилиллэр тэриллэри уонна сири хорутар булуугтары көрүү боппуруоһун көтөхтө.

Ону тэҥэ Хонуу сэлиэнньэтигэр төгүрүк сыл устата нэһилиэнньэ уонна ааһар айанньыттар олохторугар куттал суох буолуутун хааччыйар, ыксаллаах быһыыны-майгыны туоратар көрдүүр-быыһыыр сулууспа тэрийиитин олус наадалааҕынан бэлиэтээтэ.