Музыкальнай оскуолалары «Култуура» национальнай бырайыак чэрчитинэн өрөмүөннүөхтэрэ

Саха сиригэр оҕо искуустубатын оскуолаларын Россия бэрэсидьиэнэ Владимир Путин туһаайыытын толоруу уонна «Култуура» национальнай бырайыак чэрчитинэн өрөмүөннүөхтэрэ. Бу туһунан СӨ култуураҕа уонна духуобунай сайдыыга министиэристибэтин пресс-сулууспата иһитиннэрэр.

«Дойду бэрэсидьиэнэ Сүбэ мунньахха тохсунньутааҕы түһаайыытын кэмигэр бигэргэппит соруктарыттан биирдэстэринэн, Россия бырабыыталыстыбата регионнары кытта бииргэ үбүлээн, оҕо искуустубатын уонна музыка оскуолаларын хапытаалынай өрөмүөннэрин ыытыыга уонна хааччыйыыга миэрэлэри ылыы буолар. Бу сыалга 2020-2022 сылларга федеральнай субсидия көрүлүннэ», — диэн СӨ култуураҕа уонна духуобунай сайдыыга миниистирин солбуйааччы Марина Силина «Өрөспүүбүлүкэтээҕи методическэй сулууспа уус-уран үөрэхтээһин систиэмэтигэр оруола» диэн оҕо оскуолаларын үлэһиттэрин өрөспүүбүлүкэтээҕи сүбэ мунньаҕар эттэ.

2019 сылга «Култуура» национальнай бырайыак иитинэн өрөспүүбүлүкэҕэ тоҕус оҕо искуустубатын осколатын музыкальнай инструменнарынан, тээбириннэринэн уонна үөрэх матырыйаалларынан хааччыллыбыта.