Мытаахха саҥа култуура дьиэтэ аһылынна

Алтынньы 17 күнүгэр Горнай улууһун Мытаах нэһилиэгэр үөрүүлээх быһыыга саҥа култуура дьиэтэ уонна түмэл-галерея аһылынна.

Саҥа эбийиэк «Култуура» национальнай бырайыак чэрчитинэн үбүлэнэн, «Сахастрой2002» тэрилтэ үлэһиттэрэ уонна олохтоох нэһилиэнньэ кыттыытынан тутулунна.

Маҥнайгы мэндиэмэнигэр сынньалаҥ киинин сэргэ Саха сиригэр биллэр «Дьиикимдэ дьээбэлэрэ» мини-театр үлэлиэхтэрэ. Оттон иккис мэндиэмэнигэр биллиилээх худуоһунньук, академик Афанасий Осипов аатынан түмэл-галерея олохсуйда.

«Бу тутуу киһини Саха Өрөспүүбүлүкэтин кытары билиһиннэрэр, санаатын түмэр уонна улуу суруйааччылар Сэмэн, Софрон Даниловтар уонна биллиилээх худуоһунньук Афанасий Осипов олохторун, ситиһиилэрин, күүрээннээх үлэлэрин туоһуларын, баай нэһилиэстибэлэрин сырдатар киин буолар», — диэн СӨ култуураҕа уонна духуобунай сайдыыга миниистирэ Юрий Куприянов эттэ.

Нэһилиэк култуурнай киинин аһыллыытыгар өрөспүүбүлүкэ салалтата, бырабыыталыстыба бэрэссэдээтэлэ Владимир Солодов, киэн туттар биир дойдулаахтара, Саха сирин суруйааччылара, маны сэргэ норуоттар икки ардыларынааҕы «Үрүҥ хаар алгыһа» бэстибээл ыалдьыттара кыттыыны ыллылар.

Сэмэн Данилов “Хаар” хоһоонун сэттэ омук тылынан саҥардан, мустубут ыалдьыттар биһирэбиллэрин ыллылар.